This document is an excerpt from the EUR-Lex website
Document 32025R0415
Commission Delegated Regulation (EU) 2025/415 of 13 December 2024 supplementing Regulation (EU) 2023/1114 of the European Parliament and of the Council with regard to regulatory technical standards specifying adjustment of own funds requirement and minimum features of stress testing programmes of issuers of asset-referenced tokens or of e-money tokens
Regolament Delegat tal-Kummissjoni (UE) 2025/415 tat-13 ta’ Diċembru 2024 li jissupplimenta r-Regolament (UE) 2023/1114 tal-Parlament Ewropew u tal-Kunsill fir-rigward ta’ standards tekniċi regolatorji li jispeċifikaw l-aġġustament tar-rekwiżit tal-fondi proprji u l-karatteristiċi minimi tal-programmi tat-testijiet tal-istress tal-emittenti tat-tokens irreferenzjati ma’ assi u tat-tokens tal-flus elettroniċi
Regolament Delegat tal-Kummissjoni (UE) 2025/415 tat-13 ta’ Diċembru 2024 li jissupplimenta r-Regolament (UE) 2023/1114 tal-Parlament Ewropew u tal-Kunsill fir-rigward ta’ standards tekniċi regolatorji li jispeċifikaw l-aġġustament tar-rekwiżit tal-fondi proprji u l-karatteristiċi minimi tal-programmi tat-testijiet tal-istress tal-emittenti tat-tokens irreferenzjati ma’ assi u tat-tokens tal-flus elettroniċi
C/2024/6908
ĠU L, 2025/415, 24.3.2025, ELI: http://data.europa.eu/eli/reg_del/2025/415/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
ELI: http://data.europa.eu/eli/reg_del/2025/415/oj
|
Il-Ġurnal Uffiċjali |
MT Is-serje L |
|
2025/415 |
24.3.2025 |
REGOLAMENT DELEGAT TAL-KUMMISSJONI (UE) 2025/415
tat-13 ta’ Diċembru 2024
li jissupplimenta r-Regolament (UE) 2023/1114 tal-Parlament Ewropew u tal-Kunsill fir-rigward ta’ standards tekniċi regolatorji li jispeċifikaw l-aġġustament tar-rekwiżit tal-fondi proprji u l-karatteristiċi minimi tal-programmi tat-testijiet tal-istress tal-emittenti tat-tokens irreferenzjati ma’ assi u tat-tokens tal-flus elettroniċi
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2023/1114 tal-Parlament Ewropew u tal-Kunsill tal-31 ta’ Mejju 2023 dwar is-swieq fil-kriptoassi, u li jemenda r-Regolamenti (UE) Nru 1093/2010 u (UE) Nru 1095/2010 u d-Direttivi 2013/36/UE u (UE) 2019/1937 (1), u b’mod partikolari l-Artikolu 35(6), it-tielet subparagrafu, tiegħu,
Billi:
|
(1) |
Ir-rekwiżiti stabbiliti fl-Artikolu 35(3) u (5) tar-Regolament (UE) 2023/1114 japplikaw ukoll għall-istituzzjonijiet tal-flus elettroniċi li joħorġu tokens tal-flus elettroniċi sinifikanti, f’konformità mal-Artikolu 58(1), il-punt (b), ta’ dan ir-Regolament u, fejn meħtieġ mill-awtorità kompetenti skont l-Artikolu 58(2) ta’ dan ir-Regolament, għall-istituzzjonijiet tal-flus elettroniċi li joħorġu tokens tal-flus elettroniċi li ma jkunux sinifikanti. |
|
(2) |
Meta l-awtoritajiet kompetenti jivvalutaw iċ-ċirkostanzi li jirrikjedu fondi proprji ogħla għall-emittenti ta’ tokens irreferenzjati ma’ assi jew ta’ tokens tal-flus elettroniċi, jenħtieġ li dawn jikkunsidraw l-impatt li falliment tat-tokens jista’ jkollu fuq l-istabbiltà finanzjarja, inkluż it-tifdijiet fuq skala kbira, l-iskattar tal-bejgħ bi prezzijiet ferm mraħħsa minħabba diffikultà finanzjarja tal-assi ta’ riżerva jew fil-ġbid ta’ depożiti, li potenzjalment jikkawżaw tfixkil sinifikanti fis-suq, konsegwenzi negattivi possibbli għall-finanzjament, u riskji sistemiċi fis-sistema finanzjarja kollha. |
|
(3) |
Minħabba n-novità tat-tokens irreferenzjati ma’ assi u tat-tokens tal-flus elettroniċi u tal-emittenti tagħhom, ma jeżisti l-ebda qafas universali ta’ valutazzjoni tar-riskju. Għalhekk, meta jiddeċiedu jekk żieda fir-rekwiżit ta’ fondi proprji hijiex ġustifikata, jenħtieġ li l-awtoritajiet kompetenti jwettqu l-evalwazzjoni fuq kwalunkwe emittent rilevanti skont il-każ li jkun wara valutazzjoni wiesgħa tal-kriterji tar-riskju rilevanti kollha stabbiliti fl-Artikolu 35(3) tar-Regolament (UE) 2023/1114. Il-ħtieġa ta’ żieda possibbli fir-rekwiżiti ta’ fondi proprji jenħtieġ li tiddependi fuq ċirkostanzi speċifiċi għall-emittent. Jenħtieġ li l-emittenti ta’ tokens irreferenzjati ma’ assi jew ta’ tokens tal-flus elettroniċi li jkunu soġġetti għal dawn ir-rekwiżiti ta’ fondi proprji, dejjem ikunu kapitalizzati b’mod adegwat għar-riskji li jiffaċċjaw. L-informazzjoni storika u attwali rilevanti kollha disponibbli jenħtieġ li tintuża għall-valutazzjoni u l-evalwazzjoni wiesgħa msemmija. Ġeneralment, iż-żidiet fir-rekwiżiti ta’ fondi proprji jenħtieġ li jintalbu biss meta jkun hemm grad ogħla ta’ riskju li ma jkunx diġà kopert, u l-miżuri tal-emittent rilevanti ma jkunux effettivi biżżejjed biex inaqqsu r-riskji. |
|
(4) |
Meta awtorità kompetenti tirrikjedi żieda fir-rekwiżiti ta’ fondi proprji tal-emittent tat-tokens, il-perjodu ta’ żmien ipprovdut għall-konformità ma’ din iż-żieda jenħtieġ li jkun qasir kemm jista’ jkun peress li l-emittent rilevanti, li japplika ġestjoni tar-riskju xierqa u effettiva, jenħtieġ li dejjem jkun kapitalizzat b’mod adegwat għar-riskji li jiffaċċja. |
|
(5) |
Meta awtorità kompetenti tikkonkludi li r-riskji, inkluża l-volatilità, ta’ token irreferenzjat ma’ assi partikolari jew ta’ token tal-flus elettroniċi jista’ jwassal għal deterjorament sinifikanti tas-sitwazzjoni finanzjarja tal-emittent rilevanti jew iħalli impatt fuq l-istabbiltà finanzjarja tiegħu, jenħtieġ li l-awtorità kompetenti tistabbilixxi perjodu ta’ żmien iqsar għall-emittent rilevanti biex iżid il-fondi proprji. |
|
(6) |
Sabiex jiġi żgurat li l-emittenti tat-tokens irreferenzjati ma’ assi jew tat-tokens tal-flus elettroniċi jieħdu deċiżjonijiet sodi dwar il-ġestjoni tar-riskju, dawn l-emittenti u l-awtoritajiet kompetenti rilevanti tagħhom jenħtieġ li jifhmu r-riskji finanzjarji u operazzjonali li jiġu maż-żieda fl-użu ta’ tokens irreferenzjati ma’ assi jew ta’ tokens tal-flus elettroniċi. Barra minn hekk, jenħtieġ li jqisu l-interkonnessjonijiet mal-ekosistema tal-emittenti tat-tokens b’mod aktar wiesa’ u l-interkonnettività inerenti mas-settur finanzjarju tradizzjonali li tirriżulta mir-riżervi tal-assi miżmuma. Għalhekk, huwa meħtieġ li jiġi speċifikat aktar it-test tal-istress tar-riskju ta’ solvenza u ta’ likwidità tal-emittenti. |
|
(7) |
L-impatt tal-hekk imsejjaħ “riskju tal-potenzjal tal-irtirar tad-depożiti” (“run-risk”), li jfisser żieda f’daqqa fit-talbiet għat-tifdija tat-tokens, li tirriżulta f’bejgħ bl-għaġla tal-assi ta’ riżerva li jsostnu lit-tokens, jenħtieġ li tiġi analizzata permezz tat-test tal-istress tal-likwidità. Għalhekk, huwa essenzjali li jiġu speċifikati l-karatteristiċi minimi tat-test tal-istress tal-likwidità bħalma huma dawk relatati mal-governanza, l-infrastruttura tad-data, il-kategorizzazzjoni tar-riskju u l-frekwenza. |
|
(8) |
Sabiex jiġi żgurat li r-riżultati tat-test tal-istress jibqgħu rilevanti, jenħtieġ li t-test tal-istress ta’ solvenza jitwettaq fuq bażi trimestrali għall-emittenti tat-tokens irreferenzjati ma’ assi sinifikanti jew tat-tokens tal-flus elettroniċi, u fuq bażi semiannwali għall-emittenti tat-tokens irreferenzjati ma’ assi mhux sinifikanti jew tat-tokens tal-flus elettroniċi. It-test tal-istress tal-likwidità jenħtieġ li jitwettaq kull xahar. |
|
(9) |
It-test tal-istress jenħtieġ li jqis xenarji ta’ stress finanzjarju severi iżda plawżibbli u xenarji ta’ stress mhux finanzjarju, bħal xokkijiet tal-likwidità, xokkijiet tal-kreditu, xokkijiet tar-rati tal-imgħax u tal-kambju, riskju ta’ tifdija u xokkijiet operazzjonali u ta’ partijiet terzi. Jenħtieġ li jiżgura wkoll li l-arranġamenti ta’ governanza interna u l-infrastrutturi tad-data rilevanti jkunu fis-seħħ biex jippermettu lill-emittenti ta’ tokens irreferenzjati ma’ assi jew ta’ tokens tal-flus elettroniċi u lill-awtoritajiet kompetenti jifhmu l-karatteristiċi, jikkwantifikaw ir-riskji u jiġbru evidenza li dawn l-emittenti qegħdin effettivament jallokaw u jimmitigaw ir-riskju fuq bażi kontinwa. |
|
(10) |
Bħala prinċipju ta’ gwida, il-programmi tat-testijiet tal-istress jenħtieġ li jsegwu regoli u approċċ simili fir-rigward tat-test tal-istress tal-istituzzjonijiet ta’ kreditu skont id-Direttiva 2013/36/UE tal-Parlament Ewropew u tal-Kunsill (2). Madankollu, meta jitqies li r-riskji tal-attivitajiet tal-kriptoassi pprovduti mill-emittenti tat-tokens irreferenzjati ma’ assi jew tat-tokens tal-flus elettroniċi li mhumiex istituzzjonijiet ta’ kreditu huma differenti minn dawk tal-istituzzjonijiet ta’ kreditu, huwa meħtieġ li l-attivitajiet tal-kriptoassi jiġu raggruppati f’kategoriji ta’ riskju differenti għall-fini tat-test tal-istress. Barra minn hekk, jenħtieġ li r-raggruppament tal-attivitajiet tal-kriptoassi u r-riskji jiżgura li l-emittenti tat-tokens rilevanti u l-awtoritajiet kompetenti jkunu jistgħu jidentifikaw il-funzjonijiet, il-proċessi u l-atturi kollha, flimkien mar-riskji assoċjati tagħhom inkluż kwalunkwe fattur ambjentali, soċjali u ta’ governanza, u jidentifikaw kwalunkwe kwistjoni jew riskju potenzjali. Dawn l-identifikazzjonijiet jenħtieġ li jiffaċilitaw it-tfassil u l-assenjazzjoni ta’ xenarji ta’ riskju speċifiċi ppreżentati fl-attivitajiet differenti tal-emittent rilevanti. Ix-xenarji jenħtieġ li jiġu definiti sew sabiex jiġi kkwantifikat l-impatt potenzjali tagħhom, il-firxa ta’ telf potenzjali u l-firxa ta’ plawżibbiltà assoċjata max-xenarji ta’ riskju speċifiċi identifikati. Għalhekk, meta l-emittent rilevanti jidentifika r-riskji speċifiċi, jenħtieġ li jispeċifika l-iskeda ta’ żmien tax-xenarju ta’ stress, li jenħtieġ li tkun ta’ tliet snin għat-test tal-istress tas-solvenza u sa sena għat-test tal-istress ta’ likwidità. |
|
(11) |
Dan ir-Regolament huwa bbażat fuq l-abbozz tal-istandards tekniċi regolatorji sottomess lill-Kummissjoni mill-Awtorità Bankarja Ewropea (EBA). |
|
(12) |
L-EBA wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji li fuqhom huwa bbażat dan ir-Regolament, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (3), |
ADOTTAT DAN IR-REGOLAMENT:
Artikolu 1
Kamp ta’ applikazzjoni
Dan ir-Regolament japplika għall-emittenti li ġejjin tat-tokens irreferenzjati ma’ assi jew tat-tokens tal-flus elettroniċi:
|
(a) |
l-emittenti ta’ tokens irreferenzjati ma’ assi; |
|
(b) |
l-istituzzjonijiet tal-flus elettroniċi li joħorġu tokens tal-flus elettroniċi sinifikanti; |
|
(c) |
l-istituzzjonijiet tal-flus elettroniċi li joħorġu tokens tal-flus elettroniċi li ma jkunux sinifikanti, meta meħtieġ mill-awtorità kompetenti, skont l-Artikolu 58(2) tar-Regolament (UE) 2023/1114. |
Artikolu 2
Proċedura
1. L-awtorità kompetenti tal-Istat Membru domiċiljari (l-awtorità kompetenti) għandha tipprovdi lil emittent ta’ tokens irreferenzjati ma’ assi jew ta’ tokens tal-flus elettroniċi l-abbozz tad-deċiżjoni tagħha biex tirrikjedi ż-żieda fil-fondi proprji f’konformità mal-Artikolu 35(3) tar-Regolament (UE) 2023/1114 filwaqt li tqis kif xieraq il-fehmiet espressi mill-emittent rilevanti.
2. L-abbozz imsemmi fil-paragrafu 1 għandu jistabbilixxi:
|
(a) |
l-ammont li bih iridu jiżdiedu l-fondi proprji u l-perċentwal li jkun ogħla mill-ammont ta’ riżerva ta’ assi li jirriżulta mill-applikazzjoni tal-Artikolu 35(1), l-ewwel subparagrafu, il-punt (b) tar-Regolament (UE) 2023/1114; |
|
(b) |
ir-raġunament rilevanti dwar il-grad ogħla ta’ riskju; |
|
(c) |
jekk dak il-grad ogħla ta’ riskju jistax ikollu impatt materjali fuq is-sitwazzjoni finanzjarja tal-emittent jew fuq l-istabbiltà finanzjarja ta’ sistema finanzjarja usa’; |
|
(d) |
jekk dak il-grad ogħla ta’ riskju huwiex indipendenti mill-governanza jew mill-mudell tan-negozju rilevanti tal-emittent; |
|
(e) |
il-perjodu ta’ żmien li fih l-emittent rilevanti għandu jżid il-fondi proprji tiegħu f’konformità mal-Artikolu 3. |
3. L-emittent tat-tokens irreferenzjati ma’ assi jew tat-tokens tal-flus elettroniċi għandu jesprimi l-fehmiet tiegħu dwar kwalunkwe wieħed mill-elementi msemmija fil-paragrafu 2 fi żmien 25 jum tax-xogħol minn meta jirċievi l-abbozz.
4. L-awtorità kompetenti għandha tinnotifika lill-emittent tat-tokens irreferenzjati ma’ assi jew tat-tokens tal-flus elettroniċi bid-deċiżjoni finali tagħha li jkun fiha l-elementi elenkati fil-paragrafu 2.
5. L-emittent tat-tokens irreferenzjati ma’ assi jew tat-tokens tal-flus elettroniċi għandu jissottometti lill-awtorità kompetenti, fi żmien 25 jum tax-xogħol minn meta jirċievi d-deċiżjoni msemmija fil-paragrafu 4, pjan dettaljat dwar kif il-fondi proprji tiegħu għandhom jiżdiedu fil-perjodu ta’ żmien stabbilit mill-awtorità kompetenti. Il-pjan għandu jkun fih dan li ġej:
|
(a) |
il-passi marbuta biż-żmien, miżuri u proċeduri speċifiċi biex titwettaq iż-żieda fil-perjodu ta’ żmien stabbilit; |
|
(b) |
il-konferma li l-użu previst tal-elementi u tal-istrumenti ta’ fondi proprji biex jikkonformaw mar-rekwiżit miżjud jissodisfa bis-sħiħ il-kundizzjonijiet stabbiliti fl-Artikolu 35(2) tar-Regolament (UE) 2023/1114. |
6. Meta l-perjodu ta’ żmien, imsemmi fl-Artikolu 3, stabbilit għat-tlestija taż-żieda fil-fondi proprji jkun itwal minn tliet xhur, l-emittent tat-tokens irreferenzjati ma’ assi jew tat-tokens tal-flus elettroniċi għandu jinforma lill-awtoritajiet kompetenti fuq bażi ta’ kull xahar dwar il-progress tal-implimentazzjoni tal-pjan.
7. L-emittent tat-tokens irreferenzjati ma’ assi jew tat-tokens tal-flus elettroniċi għandu jinforma lill-awtorità kompetenti minnufih f’każ li kwalunkwe pass jew proċedura ma tkunx tista’ titwettaq fil-perjodu ta’ żmien li jirrispetta r-rekwiżiti stabbiliti fl-Artikolu 3.
8. L-awtorità kompetenti għandha tissorvelja mill-qrib l-implimentazzjoni tal-pjan.
9. Meta jitwaqqaf kulleġġ, kif imsemmi fl-Artikolu 119(1) tar-Regolament (UE) 2023/1114, l-awtorità kompetenti għandha żżomm lill-Awtorità Bankarja Ewropea mgħarrfa bl-informazzjoni kollha msemmija fil-paragrafi minn 2 sa 8, inkluż l-abbozz u d-deċiżjoni finali, il-pjan u kwalunkwe aġġornament rilevanti.
Artikolu 3
Perjodu ta’ żmien
1. Mingħajr preġudizzju għall-paragrafu 2, l-awtorità kompetenti għandha tistabbilixxi perjodu ta’ żmien għall-emittent tat-tokens irreferenzjati ma’ assi jew tat-tokens tal-flus elettroniċi biex jaġġusta għal rekwiżiti ogħla ta’ fondi proprji stabbiliti abbażi tal-valutazzjoni tal-awtorità kompetenti msemmija fl-Artikolu 35(3) tar-Regolament (UE) 2023/1114, li ma jistax jaqbeż is-sitt xhur min-notifika tad-deċiżjoni finali msemmija fl-Artikolu 2(4).
2. Meta l-awtorità kompetenti tistabbilixxi l-perjodu ta’ żmien għall-emittent tat-tokens irreferenzjati ma’ assi jew tat-tokens tal-flus elettroniċi biex jaġġusta għal rekwiżiti ogħla ta’ fondi proprji, hija għandha tqis kwalunkwe grad ogħla potenzjali ta’ riskju li jista’ jkollu impatt materjali fuq l-istabbiltà finanzjarja tas-sistema finanzjarja usa’ jew tal-emittent, u kwalunkwe nuqqas potenzjali fil-governanza jew fil-mudell tan-negozju tal-emittent rilevanti.
Artikolu 4
Kriterji
Meta tadotta d-deċiżjoni msemmija fl-Artikolu 35(3) tar-Regolament (UE) 2023/1114, l-awtorità kompetenti għandha tikkunsidra l-kriterji kollha tal-valutazzjoni tar-riskju li ġejjin:
|
(a) |
jekk l-emittent tat-tokens irreferenzjati ma’ assi jew tat-tokens tal-flus elettroniċi hux probabbli li jikser ir-rekwiżiti msemmija fl-Artikolu 34(1), (8) u (10) u fl-Artikoli minn 36 sa 39 tar-Regolament (UE) 2023/1114 fi żmien 12-il xahar, billi tivvaluta jekk hemmx nuqqasijiet jew dgħufijiet potenzjali tal-emittent tat-tokens irreferenzjati ma’ assi jew tat-tokens tal-flus elettroniċi meta jiġu applikati r-rekwiżiti kollha stabbiliti fl-Artikolu 34 u fl-Artikoli minn 36 sa 39 tar-Regolament (UE) 2023/1114; |
|
(b) |
jekk it-tifdija b’parità u bil-valur tas-suq hijiex żgurata f’ċirkostanzi normali jew f’ċirkostanzi tas-suq taħt stress; |
|
(c) |
jekk hemmx riskju akbar ta’ deterjorament sinifikanti fil-valur tal-assi ta’ riżerva jew tas-sitwazzjoni finanzjarja tal-emittent tat-tokens irreferenzjati ma’ assi jew tat-tokens tal-flus elettroniċi; |
|
(d) |
jekk ir-riskju operazzjonali jiżdiedx, li jirriżulta minn sistemi inkluż ir-reġistru distribwit sottostanti u kwalunkwe pjattaforma ta’ skambju, infrastruttura tas-suq jew sistema ta’ pagament użati għall-ħruġ jew għat-trasferiment tat-token u minn fornituri ta’ servizzi tal-kriptoassi ta’ partijiet terzi oħra bħal kustodji, li jistgħu jiddependu fuqhom it-tokens jew l-assi ta’ riżerva. |
Artikolu 5
It-tfassil tal-programm tat-testijiet tal-istress
1. L-emittenti ta’ tokens irreferenzjati ma’ assi jew ta’ tokens tal-flus elettroniċi għandhom jiżguraw li l-programm tagħhom tat-test tal-istress jkun vijabbli u realistiku, u li t-test tal-istress jirriżulta f’teħid ta’ deċiżjonijiet infurmati, fil-livell maniġerjali kollu, dwar ir-riskji eżistenti u potenzjali kollha li jkollhom impatt materjali fuq is-sitwazzjoni finanzjarja tal-emittent.
2. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jirrieżaminaw u jivvalutaw regolarment il-programm tat-testijiet tal-istress tagħhom biex jiddeterminaw l-effettività, ir-robustezza u l-adegwatezza tiegħu kemm fir-rigward tal-karatteristiċi tar-riskju tal-emittent rilevanti nnifsu kif ukoll fir-rigward tat-tokens rilevanti maħruġa u għandhom iżommuh aġġornat. Din il-valutazzjoni għandha ssir fuq bażi annwali u għandha tirrifletti bis-sħiħ il-kundizzjonijiet esterni u interni.
3. Meta jfasslu l-programm tat-testijiet tal-istress, l-emittenti tat-tokens irreferenzjati ma’ assi jew tat-tokens tal-flus elettroniċi għandhom jikkunsidraw l-elementi kollha li ġejjin:
|
(a) |
l-effettività tal-programm biex jintlaħqu l-għanijiet maħsuba tiegħu; |
|
(b) |
il-ħtieġa għal titjib; |
|
(c) |
il-fatturi ta’ riskju identifikati, ir-raġunament għax-xenarji rilevanti u t-tfassil tagħhom, is-suppożizzjonijiet tal-mudell u s-sensittività tar-riżultati għal dawn is-suppożizzjonijiet, kif ukoll ir-rwol ta’ ġudizzju espert biex jiġi żgurat li jkun akkumpanjat minn analiżi soda; |
|
(d) |
il-prestazzjoni tal-mudell, inkluża l-prestazzjoni tiegħu fuq data barra mill-kampjun, bħal data li ma ntużatx għall-iżvilupp tal-mudell; |
|
(e) |
kif jiġu inkorporati ċirki vizzjużi bejn is-solvenza u l-likwidità; |
|
(f) |
l-adegwatezza ta’ interkonnessjonijiet possibbli bejn it-testijiet tal-istress tas-solvenza u t-testijiet tal-istress tal-likwidità; |
|
(g) |
il-feedback riċevut mill-awtoritajiet kompetenti fil-kuntest tat-testijiet tal-istress superviżorji jew ta’ testijiet tal-istress oħra; |
|
(h) |
l-adegwatezza tal-infrastruttura tad-data (l-implimentazzjoni tas-sistemi u l-kwalità tad-data); |
|
(i) |
il-livell xieraq tal-involviment tal-maniġment superjuri u tal-korp maniġerjali; |
|
(j) |
is-suppożizzjonijiet kollha inklużi s-suppożizzjonijiet tan-negozju u/jew maniġerjali, u l-azzjonijiet ta’ ġestjoni previsti, ibbażati fuq l-iskop, it-tip u r-riżultat tat-test tal-istress, inkluża valutazzjoni tal-fattibbiltà tal-azzjonijiet ta’ ġestjoni f’sitwazzjonijiet ta’ stress u f’ambjent tan-negozju li qed jinbidel; |
|
(k) |
l-adegwatezza u t-trasparenza tad-dokumentazzjoni rilevanti. |
4. Il-programm ta’ test tal-istress għandu jiġi ddokumentat b’mod xieraq għat-tipi kollha ta’ testijiet tal-istress imwettqa.
5. Il-programm ta’ test tal-istress għandu jiġi evalwat fl-organizzazzjoni kollha kemm hi, pereżempju mill-kumitat tar-riskju u l-awdituri interni. L-unitajiet tan-negozju mhux responsabbli għat-tfassil u l-applikazzjoni tal-programm jew l-esperti esterni għandhom jikkontribwixxu wkoll għall-valutazzjoni ta’ dan il-proċess, filwaqt li jqisu l-għarfien espert rilevanti għal suġġetti speċifiċi.
6. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jiżguraw, kemm għat-tfassil inizjali kif ukoll għall-valutazzjoni tal-programm ta’ test tal-istress, li jkun seħħ djalogu effettiv bl-involviment ta’ esperti mill-oqsma tan-negozju kollha tal-emittent u li l-programm u l-aġġornamenti tiegħu jkunu ġew rieżaminati kif xieraq mill-maniġment superjuri u mill-korp maniġerjali tal-emittent, li jkunu responsabbli wkoll mill-monitoraġġ tal-eżekuzzjoni u s-sorveljanza tiegħu.
Artikolu 6
Tip ta’ testijiet tal-istress
1. L-emittenti ta’ tokens irreferenzjati ma’ assi jew ta’ tokens tal-flus elettroniċi għandhom jimplimentaw it-test tal-istress tas-solvenza u t-test tal-istress tal-likwidità.
2. It-test tal-istress tas-solvenza għandu jkopri l-impatt ta’ ċerti żviluppi inklużi xenarji makroekonomiċi jew mikroekonomiċi, dwar il-pożizzjoni kapitali ġenerali tal-emittent tat-tokens irreferenzjati ma’ assi jew tat-tokens tal-flus elettroniċi, inkluż fuq ir-rekwiżiti ta’ fondi proprji minimi jew addizzjonali tiegħu, permezz tal-projezzjoni tar-riżorsi kapitali u r-rekwiżiti tal-emittenti, filwaqt li jiġu enfasizzati l-vulnerabbiltajiet tal-emittent u tiġi vvalutata l-kapaċità tiegħu li jassorbi t-telf u l-impatt fuq il-pożizzjonijiet ta’ solvenza tiegħu.
3. It-test tal-istress tal-likwidità għandu jkopri l-impatt ta’ ċerti żviluppi inklużi xenarji makroekonomiċi jew mikroekonomiċi, minn perspettiva ta’ riskju tas-suq u ta’ finanzjament kif ukoll ta’ xokkijiet għal-likwidità tar-riżerva ta’ assi u tal-pożizzjoni tal-likwidità ġenerali tal-emittent ta’ tokens irreferenzjati ma’ assi jew ta’ tokens tal-flus elettroniċi, inkluż ir-rekwiżiti minimi jew addizzjonali ta’ likwidità tiegħu.
4. Id-disinn speċifiku, il-kumplessità u l-livell ta’ dettall tal-metodoloġiji tat-test tal-istress għandhom ikunu xierqa għan-natura tat-token irreferenzjat ma’ assi jew tat-token tal-flus elettroniċi, inklużi n-natura, l-iskala u d-daqs tad-drittijiet ta’ tifdija, kif ukoll il-kumplessità, il-konċentrazzjoni u l-kompożizzjoni tal-assi ta’ riżerva tiegħu.
Artikolu 7
Frekwenza minima tal-eżerċizzji differenti tat-testijiet tal-istress
1. Il-frekwenza tat-test tal-istress tas-solvenza għandha tkun mill-inqas trimestrali għall-emittenti ta’ tokens irreferenzjati ma’ assi jew ta’ tokens tal-flus elettroniċi sinifikanti, u fuq bażi semiannwali għall-emittenti ta’ tokens irreferenzjati ma’ assi jew ta’ tokens tal-flus elettroniċi mhux sinifikanti.
2. Il-frekwenza tat-test tal-istress tal-likwidità għandha tkun mill-inqas ta’ kull xahar għall-emittenti kollha tat-tokens irreferenzjati ma’ assi jew tat-tokens tal-flus elettroniċi.
Artikolu 8
Arranġamenti ta’ governanza interna taħt l-eżerċizzji tat-testijiet tal-istress
1. Il-programm tat-testijiet tal-istress tal-emittent tat-tokens irreferenzjati ma’ assi jew tat-tokens tal-flus elettroniċi għandu jiġi adottat mill-korp maniġerjali tiegħu, li għandu jkun responsabbli għall-implimentazzjoni tiegħu f’konformità ma’ dan ir-Regolament u mar-Regolament (UE) 2023/1114.
2. Il-programm tat-testijiet tal-istress għandu jinkludi valutazzjoni dwar jekk il-membri tal-korp maniġerjali, kollettivament, għandhomx għarfien, ħiliet u esperjenza suffiċjenti biex iwettqu dan kollu li ġej:
|
(a) |
jifhmu bis-sħiħ l-impatt tal-eventi ta’ stress fuq il-profil tar-riskju ġenerali tal-emittent; |
|
(b) |
jiżguraw li jkunu ġew assenjati u allokati responsabbiltajiet ċari u riżorsi suffiċjenti, bħal riżorsi umani kkwalifikati u sistemi tat-teknoloġija tal-informazzjoni, biex jitwettqu t-testijiet tal-istress; |
|
(c) |
jinvolvu ruħhom b’mod attiv f’diskussjonijiet mal-persunal involut fit-testijiet tal-istress u ma’ persuni li lilhom jiġu esternalizzati kompiti relatati mat-testijiet tal-istress; |
|
(d) |
jivvalutaw b’mod kritiku s-suppożizzjonijiet ewlenin tal-immudellar, l-għażla tax-xenarju u s-suppożizzjonijiet sottostanti tat-testijiet tal-istress b’mod ġenerali; |
|
(e) |
jiddeċiedu dwar l-azzjonijiet ta’ ġestjoni meħtieġa u jiddiskutuhom mal-awtoritajiet kompetenti. |
3. Il-programm tat-testijiet tal-istress għandu jitfassal b’mod li jippermetti li t-testijiet tal-istress jiġu eżegwiti skont il-politiki u l-proċeduri interni rilevanti tal-emittent.
4. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jiżguraw li l-elementi kollha tal-programm tat-testijiet tal-istress, inkluża l-valutazzjoni tiegħu, ikunu dokumentati kif xieraq u aġġornati regolarment, fejn rilevanti, fil-politiki u fil-proċeduri interni.
5. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jiżguraw li t-tfassil tal-programm tat-testijiet tal-istress jipprevedi komunikazzjoni effettiva bejn il-linji operatorji u l-livelli ta’ ġestjoni, bl-għan li titqajjem kuxjenza, tittejjeb il-kultura tar-riskju u jinbdew diskussjonijiet dwar ir-riskji eżistenti u potenzjali kif ukoll dwar azzjonijiet ta’ ġestjoni possibbli.
6. Il-programm tat-testijiet tal-istress għandu jitfassal bħala parti integrali mill-qafas tal-ġestjoni tar-riskju tal-emittent. It-testijiet tal-istress għandhom jitfasslu biex jappoġġaw deċiżjonijiet u proċessi kummerċjali differenti kif ukoll l-ippjanar strateġiku. Id-deċiżjonijiet strateġiċi għandhom iqisu n-nuqqasijiet, il-limitazzjonijiet u l-vulnerabbiltajiet identifikati waqt it-testijiet tal-istress.
7. L-outputs tat-testijiet tal-istress għandhom jintużaw bħala inputs għall-proċess tal-istabbiliment tal-aptit għar-riskju u l-limiti tal-emittent u għandhom jaġixxu bħala għodda ta’ ppjanar biex tiġi ddeterminata l-effettività ta’ strateġiji kummerċjali ġodda u eżistenti u jiġi vvalutat l-impatt possibbli fuq il-fondi proprji u l-likwidità.
Artikolu 9
Infrastruttura tad-data rilevanti għall-programmi tat-testijiet tal-istress
1. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jiżguraw li l-programm tat-testijiet tal-istress ikun appoġġat minn infrastruttura tad-data adegwata u trasparenti.
2. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jiżguraw li l-infrastruttura tad-data tagħhom ikollha l-kapaċità li taqbad il-ħtiġijiet estensivi tad-data tal-programm tat-testijiet tal-istress tagħhom u li jkollhom fis-seħħ mekkaniżmi biex jiżguraw kapaċità kontinwa u konsistenti li jwettqu testijiet tal-istress kif ippjanat skont il-programm.
3. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jiżguraw li l-infrastruttura tad-data tippermetti kemm flessibbiltà kif ukoll livelli xierqa ta’ kwalità u kontroll.
4. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jiżguraw li l-infrastruttura tad-data tagħhom tkun proporzjonata għad-daqs, għall-kumplessità, u għar-riskju u għall-profil tan-negozju tagħhom, u tippermetti t-twettiq ta’ testijiet tal-istress li jkopru r-riskji materjali kollha li l-istituzzjoni tkun esposta għalihom.
5. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jiddedikaw biżżejjed riżorsi umani, finanzjarji u materjali biex jiggarantixxu l-iżvilupp u l-manutenzjoni effettivi tal-infrastruttura tad-data tagħhom, inklużi s-sistemi tat-teknoloġija tal-informazzjoni.
Artikolu 10
Il-metodoloġija, il-parametri ta’ referenza komuni u l-plawżibbiltà tas-suppożizzjonijiet
1. L-emittenti ta’ tokens irreferenzjati ma’ assi jew ta’ tokens tal-flus elettroniċi għandhom jidentifikaw il-kategoriji tar-riskji li ġejjin:
|
(a) |
ir-riskji għall-valur, it-trasferibbiltà, il-likwidità, l-aċċessibbiltà jew l-iskambjabbiltà tat-tokens irreferenzjati ma’ assi jew tat-tokens tal-flus elettroniċi u tal-assi ta’ riżerva; |
|
(b) |
ir-riskji li jirriżultaw minn sistemi, li jiddependi fuqhom it-token irreferenzjat ma’ assi jew it-token tal-flus elettroniċi, inkluż ir-reġistru distribwit sottostanti jew kwalunkwe teknoloġija oħra tat-token u kwalunkwe pjattaforma ta’ negozjar, infrastruttura tas-suq jew sistema ta’ pagament użata għall-ħruġ jew it-trasferiment tat-tokens; |
|
(c) |
ir-riskji li jirriżultaw mill-prestazzjoni ta’ arranġamenti kuntrattwali, li l-emittent rilevanti jkun daħal għalihom ma’ emittenti oħra, fornituri ta’ servizzi tal-kriptoassi, istituzzjonijiet finanzjarji jew kwalunkwe persuna fiżika jew ġuridika oħra, għall-ħruġ jew it-trasferiment tat-tokens jew għall-istabbiliment, il-ġestjoni, il-kustodja jew l-investiment tal-assi ta’ riżerva, inkluż kwalunkwe arranġament li bih l-emittent jesternalizza l-kompiti. |
2. Sabiex jiġu vvalutati r-riskji msemmija fil-paragrafu 1, l-emittenti tat-tokens irreferenzjati ma’ assi jew tat-tokens tal-flus elettroniċi għandhom jidentifikaw xenarji ta’ riskju speċifiċi bl-użu ta’ xenarji storiċi u/jew xenarji ipotetiċi fir-rigward tal-kategoriji ta’ riskju differenti msemmija fil-paragrafu 1.
3. Ix-xenarji ta’ riskju speċifiċi msemmija fil-paragrafu 2 għandhom jiġu definiti sew u l-impatt potenzjali tagħhom għandu jkun kwantifikabbli.
4. Meta jidentifikaw ir-riskji speċifiċi, l-emittenti tat-tokens irreferenzjati ma’ assi jew tat-tokens tal-flus elettroniċi għandhom jispeċifikaw perjodu ta’ żmien ta’ 3 snin għall-eventi ta’ riskju relatati mat-test tal-istress tas-solvenza u sa sena għat-test tal-istress tal-likwidità, l-assi li jkun f’riskju u deskrizzjoni preċiża tax-xenarju tar-riskju.
5. L-emittenti tat-tokens irreferenzjati ma’ assi jew tat-tokens tal-flus elettroniċi għandhom jikkwantifikaw jew ikollhom stimi approssimattivi tas-severità u l-plawżibbiltà tax-xenarji ta’ stress identifikati kif ukoll tat-telf potenzjali li jirriżulta minn dawn ix-xenarji.
Artikolu 11
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-13 ta’ Diċembru 2024.
Għall-Kummissjoni
Il-President
Ursula VON DER LEYEN
(1) ĠU L 150 9.6.2023, p. 40, ELI: http://data.europa.eu/eli/reg/2023/1114/oj.
(2) Id-Direttiva 2013/36/UE tal-Parlament Ewropew u tal-Kunsill tas-26 ta’ Ġunju 2013 dwar l-aċċess għall-attività tal-istituzzjonijiet ta’ kreditu u s-superviżjoni prudenzjali tal-istituzzjonijiet ta’ kreditu, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE (ĠU L 176 27.6.2013, p. 338, ELI: http://data.europa.eu/eli/dir/2013/36/oj).
(3) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12, ELI: http://data.europa.eu/eli/reg/2010/1093/oj).
ELI: http://data.europa.eu/eli/reg_del/2025/415/oj
ISSN 1977-074X (electronic edition)